معا امام الله
قبل ما قلمى يخط الكلمات دى كنت فاكره انه صعب قوى ان الواحد يوصف احلامه ويحولها لكلمات وحروف مقريه بس بمجرد ما بدأت اكتب حروف خرجت الكلمات بتوصف انا عايزة ايه وخرج حلمى على الورق وقريته ولاقيته زى ما انا عايزاه
يا ترى مين منكم عايز يكون معانا كلنا امام الله
مين حلمه زى ده ؟
حلمى الصغير اللى جمعنى مع كل اللى حلمهم زى منى هو حلم بسيط مش انى املك ملايين ولا اراضى لالالا ده ابسط من كده
انى اضمن ليّه بعد سنين ولولادى بعد منى صحبة امنة مش غضب ولا زعل مالى قلوب ناس مظلومين حلمى اللى هو حلمنا كان ابسط من اى حلم لكن اصعب من كل الاحلام لان تحقيقه مش بايدى لوحدى تحقيقه عايز ملايين ايادى تحضن بعضها
حلمنا البسيط ان جارى الطيب ميناو محمد وجارتى الغالية ماريان وزينب لما اشوفهم الصبح مش بس بسمتهم تسعدنى لكن مشاركتهم معايا فى كل حاجة تزودنى
حلمنا واحنا على ارض واحدة بناكل من نفس الزرعة وبنشرب من نفس الميه ان تكون مظلتنا واحدة ومعاملتنا واحدة
حلمى ابنى او بنتى ما يتعزلش وما يعزلش نفسه عن اى حد لمجرد ان ديانته تختلف مع انه مولود على نفس الارض والاغرب انه من نفس الجدود
كان زمان واقع وكان حقيقة ملموسة ايدين طول عمرها فى ايد بعضها لكن لما انزرع الشوك بين الايادى بعدت عن بعضها بس لازم يجى يوم تانى تتلم وترجع تانى تمسح دموع بعضها وتشد من عزمها
بمد ايدى لكل ايد تانية عايزة تعامل انسان علشان خاطر انسانيته بتبص على قلبه مش على اى حاجة تانى
مايهمنيش ديانتك يهمنى قلبك
حلمى هحققه لانى مقتنعة بيه ولانه خير هلاقى ايدين كتيرة حايرة بتدور على نفس الحلم ولما تتلم وكل ايد تلاقى ايادى كتيرة تايهة مش هبطل احلم هدور على حلم تانى احلى واحلى وهفضل الم الايادى معايا علشان نفضل كلنا معا امام الله
لو عايز ايدك تشبك معانا رد على الروابط دى
لو كنت مسلم رد على الرابط ده
لو كنت مسيحى رد على الرابط ده
posted by tota | 9:00 PM
42 Comments:
الروابط مش شغالة
الرابط اشتغل اكتب انت بس وربنا يسهل
هههههههههههههه
انا جاوبت الروابط عند مريم
منور والله
وباحيكوا على الطرح والفكره بجد
الله معكم
...........
يا توتا اكتب البوست ده عندى انا اتشرف بكده عشان شكل الليله هطول
هههههههههههههه
عشان الموضوع يكون فاعل وسخن
اوك ياريت تلبى رغبتى
تحياتى
وسعيد بان شاء الله العوده
محمد
والله ما قدرت حسيتها صعبة قوى
قلت مستحيل انت بس اللى تخط خط فى مدونتك حتى اهو احس انك شاركتنى
انا سعيدة بمشاركتك طبعا وردك على الروابط
دايما تفضل معانا وتشارك لان من غير كل قلب جميل زيك صعب اى حاجة تتغير
انا لسه ما بدأتش
بس المهم جدا في الموضوع
انك فتحتي باب المدونة من جديد
عودا حميدا يا استاذتي
لو تعرفت انى بس رجعت علشان الموضوع ده ولاهميته بالنسبة ليه مش لوحدى ليه وليك ولولادى ولولادك
انت عارف من يوم ما فتحت المدونة مكنش هدفى ابدا انى اكتب للكتابة او الفضفضة بس كان كل املى ان اغير فكرة سيئة او اعمل حاجة كويسة مش بس بالكلام
الا فى فكرة المبادرة دى كان لازم يكوم بدايتها الكلام والمصارحة وبعد لم كلنا نتكلم نتفاعل نحقق هدفنا وهو المصالحة
هستنياك تشاركنى لو همك هو همى
هو السؤال دة مشترك مع مريم
ولا اية
عموما انا هرفع عليكى قضية بخصوص الملكية الفكرية وموكلتى هى مريم
وهنغلق المدونة بتاعك بالشمع الاحمر
هههههههه
سقراط
معملتش دراسة وافية لو دورت كمان هتلاقى اكتر من 15 مدون ومدونة كاتبين نفس المعنى ده
كلنا عايزين نحقق نفس الحلم ولو دورت حبتين كمان هتلاقى يوم واحد مارس كان يوم البوست ده
ومريم مدونة ايجابية وعايزة تحقق معانا حلمنا متأخرتس عننا لما طلبنا منها تشاركنا نفس الحلم
يا سقراط ما هى المدونة يا سيدى كانت متشمعة من زمان ده فكينا الشمع مؤقتا بس علشان المبادرة دى وهتتشمع طوالى احنا نقدر على مخالفة الفلاسفة اهل المنطق
وشرفتنا ونتمنى تكون معانا فى فكرتنا
اختى العزيزة جدا توتا
حمد الله على السلامة و بجد انا من الناس الكتير اللى كنا مفتقدينك
و اسمحيلى لاهمية هذا الموضوع انى اقره بكره لانى داخل متأخر جدا و الموضوع عايز تركيز جدا لانه يهم كل واحد فينا
و بكره بأذن الله هدخل على الرابط
و اتمنى تكونى بخير و تكونى عودة حميدة لمدونتك
بيجاسوس
انا كمان سعيدة بزيارتك للمدونة
بصراحة الموضوع على اد ما هو بسيط جدا بس مهم فعلا جدا
مهم اننا نعرف ان علاقتنا مع اخوانا اتغيرت وانه لازم ترجع تانى كويسة لازم تحتها الف خط لازم علشانى وعلشانك وعلشان ولادى وولادك وولاد كل المقيمين على ارضها
علشان ميبقاش فى نقطة ضعف اى حد يستغلها بسهولة
الروابط اللى هتدخل عليها هتخليك تفكر انت فعلا بتعمل كده ولا انت مش فى بالك هتفتح مجال لفكر برغم ان فيها اسئلة بسيطة جدا بس ليها معانى مهمة
مستنياك تانى اسمع رايك ويهمنى اكتر من رأيك مشاركتك فى الفكرة بممارسة فعلية
على فكرة انا رجعت بالبوست ده لاهمية وفيمة المبادرة عندى
tota
ma3lsh eza kont bad7'ol kteer we mosh baslm , bas zrof elsho3'l, ana da7'lt 3la elrabet we ba3d matle3 3een elly 7'lfony el el2s2la, ektashaft 7aga enha mal3oba bel3ba say3a awy we 7arfna , bas 3la el3moom post gameel,
2asf marra tanya.
Best Regards.
ياااه
والله زمان يا جبلاوى
انت تيجى فى اى وقت انت صاحب فضل كبير قوى واكيد انا مش ناسية اول حد شاف تدوينة ونشرها كان بسبب مين
اما بخصوص الروابط بالعكس الرابط ابسط ما يكون وفكرته بسيطة جدا جدا وهى ان كل واحد يشغل مخه مش يجاوب بصوابعه ولما هيفكر كويس هيراجع نفسه وهيسأل نفسه هو فعلا كده وليه ما يتغيرش هو الهدف من الاستبيان مش احصائى بالمرة اد ما هو نفسى وفكرى
لو ده وصلك يبقى هو ده هدفنا من غير اى تزويق
وشكرا على مشاركتك رغم غيابك وشغلك
واحلى تحية
ليه التفرقة في روابط الرد؟؟
انتي بتتكلمي عن المساواه في الانسانية و بتفصلي في استطلاع الراي بين الاتنين
مش معاكي
تحياتي
كلبوظة هانم
منورة قوى جدا خالص
طبعا انا معاكى احنا قتلنا الجزئية دى بحثا ولكن لاننا لسه مبدئيا بنحط ايدينا الاول على المشكلة وبنقول ان حلها هيبقى اننا نبقى واحد لكن لغاية لما نبقى واحد احنا مازلنا اتنين فى كل الحاجات
الاستبيان غرضه الاساسى هو انه يخلى كل واحد يفكر فعلا احنا بنعمل كده طيب ممكن نغير ده طيب احساسنا ايه وفى حاجات يختلف فيها احساس الاقلية عن احساس الاغلبية وتناسب حد ومتناسبش التانى وعلشان نقدر نطلع نتايج منها كان لازم الفصل وزى ما قلتلك مبدئيا لغاية لما نوصل لمرحلة كلمة واحدة وهى مواطن مصرى
المهم نورتى كعادتك المدونة الصغننة
انا جاوبت علي الموضوع ده و سعيد جدا باننا بدنا نفوق علي طبيعة علاقاتنا علشان نصصح ما انكسر منها و ان كانت الافاقه كعادتنا دائما متاخره
لكن انا واثق ان شاء الله اننا هنصلح الارض للاجيال القادمه و ان لم نتمتع نحن بحياة طيبه فعلي الاقل سيتتع اولادنا بخير بلدنا
تحياتي
ذو النون
انت فين يا مواطن من اخر مرة شوفتك فيها وهى كانت الاولى والاخيرة بس سعدت انى شوفتك بقى كانسان ده غير معرفتى بيك كمدون
انا مقتنعة بان لازم يكون فى دايما بداية ممكن تتأخر بس لازم تيجى
مقتنعة اكتر ان من تاريخ البداية لتاريخ تحقيق نتيجتها الوقت بيطول قوى قوى لكن الاكيد طالما كان فى بداية يبقى فى نهاية
الدور المطلوب من كل واحد انه يقصر التوقيت ده بان كل واحد يبدأ بنفسه ويوسع نطاق الفكرة فتوسع كل يوم والسلسة تفضل ماسكة فى بعضها وتمتد وتزيد
مش عايزة من اى حد اكتر من كده
يا ترى ده طلب صعب؟
تحياتى وشرفتنا بوجودك ومشاركتك
كل كام يوم
لا ايام كتير او حتي شهور
معرفش ليه باجي عندك كاني بتطمن
بعدك اروح عند "بعدك علي بالي" بفرح اوي لما احس انكم بخير
كسبنا حاجة مهمة من التدوين، صحاب من غير كلام ولا تعليق ولا حتي داعي للكلام اللي كتبته
:)
مش انتي بخير؟
ساسو
فعلا التدوين مش مكسبه ان الكلام يخرج والفضفضة تشتغل وبس
التدوين خرجت منه بحاجة متخيلتش انى فعلا ممكن اخرج بيها او مكنتش فى حسابى
خرجت بارواح جميلة كتيرة بينى وبينهم تواصل يمكن الكلمة هى الوسيلة لكن فى الاصل الروح هى السبب
انتى بقى ليكى وضع مختلف ليه بقى لو ناسية افكرك انتى والجبلاوى سبب وجودى هنا انت كمان اول حد استضافنى ومحدش يعرف السر ده غير يجى مليون حد بس يعنى
بس طبعا ده فضل مش ممكن انساه كمان قريبة لقلبى فى كتابتك بس علشان اقرالك لازم ذهنى يبقى حاضر ما ينفعش اقرالك كروته علشان وسط الكلام فى كلام ووسط الكلام اللى بين الكلام فى احساس وانا معرفش اقرى من غير ما اوصل لده وانت عندك ده كتير قوى وبيحتاج دماغ مخصوصة ليكى
بس لما بشوف اى حد عندى ببقى عايزة اقول كل حاجة حلوة فيه علشان معنديش حاجة اعرف اقدمهاله هنا فى بيتى غير الكلام
نورتى وشرفتى حتى من غير كلام
Hello, Tota!
I loved this post.
Have a nice week.
عزيزتى
جئت اقرألك مستبشرا وعدت محبطا
الاحباط ليس من كلماتك وامنياتك الرقيقه
ولكن الاحباط من شيئين
الاول ان تاريخ البوست من شهرين وهذا يثير القلق والتساؤل عن اسباب تأخرك عن قراءك
والثانى احباط من موضوع لم افهمه ابدا مع كثره ما قرأت وفكرت فيه
لم افهم ابدا ما نوع المشكله التى يمكن ان تحدث مع جارى لانه مسيحى
لم افهم ثورة اى طرف على الطرف الثانى والنفور منه على موضوع هو اعتقاد ورأى
لم افهم اى شخص يريد ان يضع نفسه موقع الله سبحانه وتعالى فيحاسب البشر بدلا منه على اعتقاداتهم
لم افهم ابدا ان يضيق صدر شخص من شخض لحساب الله الذى هو نفسه يرزق هذا الشخص ويرعاه ويعطيه من نعمه وافضاله ما لايعد ولا يحصى ويفتح له كونه وابواب رزقه وهو عليه قادر وتحت سيطرته الكامله
لم افهم ابدا ان يفكر شركاء الوطن والارض والمصير والثقافه والحلم والامل فى ايذاء بعضهم وحولهم الاعداء من كل صوب يكيدون لهم معا ويخططون لاستعبادهم سويا
موضوع محبط جدا
harmless
لك الشكر اولا على حضورك واسفة انا على احباطك فغالبا نسيت التدوين وشُفيت من الادمان المزعوم
سبب البوست هو اهمية الموضوع فعلا
وكما وصفت بالتعبير الصريح "لم افهم" وهى لا تعنى حرفيا عدم الفهم انما تعنى ارفض هذا الذى يحدث لا يقبله عقلى ولا مشاعرى ارفض ايذاء انسان اخر ارفض ان اكون القاضى والجلاد على الارض
هكذا شعرنا جميعا وكان هذا السبب فى فكرة المبادرة
اعرف اننا نرفض ذلك الا ان هناك الملايين يحتاجون الا كلمة منك ومنى ومن كل من يرفض ذلك
هذه هى الفكرة ان ينقل كل واحد فيها رفضه لغيره وتصبح شبكة الرفض كبيرة واكبر على مدى سنوات او اكثر سنرفض جميعا انا وانت وابنائنا وكل من وصلت اليه فكرتنا ويومها فقط سيتحقق الهدف
سعيدة بوجودك وبرفضك وبكلامك الذى كم اشتاق ان اسمعه من كل مصرى
نورت المدونة الصغننة الخافت نورها
العزيزه توتا
ادعمك فى دعوتك والمنتديات على النت مليئه بافكار تزرع بذور الفتنه وياريت كلنا نقف ونرد عليهم ولا نجعل من صمتنا قوة لهم .
فلا نريد ان نقوم بدور الاغلبيه الصامته
soly 88
انت قلت الكلمة المؤلمة ان الاغلبية فعلا صامتة وعلشان على الاقل نبقى عملنا اى حاجة ولو بسيطة ومش مكلفة ومش متعبة ان كل واحد فينا بس يبتدى بنفسه انه يعرف اللى ليه واللى عليه ان يعلم اولاده الصح والعدل لو كل واحد فينا فاض شوية ومكتفاش بنفسه الدايرة هتوسع اكتر ومش تكليف ولا حاجة اد ما هو رجاء وساعتها هتبقى الاغلبية مش صامتة
وجودك لاول مرة فى المدونة المغلقة بكلماتك المحفزة يضع نور على عتمة المكان
تحياتى
الوابط مش شغاله
بس حلو البوست
بمناسبة حلول شهر رمضان الكريم ، يسرني أن أتقدم بخالص التهاني وأطيب والتمنيات لكم والأسرة الكريمة
وكل عام وانتم بخير
توتا
السلام عليكم
كل سنة وأنت طيبة أولا
ثانيا الرابط واقع تقريبا فمعرفتش أجاوب
لكن أنا وجهة نظرى ، إن الإسلام دين لاينهانا عن اللذين لم يقاتلوننا فى الدين ولم يخرجونا من ديارنا ... كما أن فى أفعال الرسول صلى الله عيه وسلم وسنته ما يدل على مدى سماحته صلى الله عليه وسلم وكرم أخلاقه مع أصحاب الديانات الأخرى ... بل ورحمته بالكفار
أن نتقبل جار لنا مسيحى .. ليست المشلكة .. ولكن المشكلة أننا لم نعد نتقبل جارنا المسلم أساسا
وكذا من الطرف الأخر ... إن هناك خللا حادثا فى أخلاقياتنا وإلتزامنا بديننا وتعاليمه
فى وسط عالم تنهشنا فيه مشكلات "كالإحتباس الحرارى ، والحروب ، والمجاعات"
أرجوك بخير توتا
السلام عليكم
حلم جميل ويارب كلنا يارب
koukawy
اه كانت شغالة بس تم وقف الاستبيان علشان نقدر نحلل النتايج ونعرضها على الويب
كنت اتمنى مشاركتك لان هى مش بس نسب وحسابات ده الاستبيان فى حد ذاته اسئلة بتخلينا نراجع نفسنا
شرفتينا
العزيز اسلام
افتقدك كثيرا
للاسف تم رفع الاستبيان لاجراء التحليل
طبعا بأيد كل اللى قلته عن ديننا وكمان الظروف المحيطة والمشاكل الكتيرة اللى خلت الناس مش مستحملة اساسا نفسها
بس هل ده مجتمع صحى وسليم ؟ هل نقدر نربى اولادنا فى المجتمع ده ؟ هنسكت ونسيب الصورة تسود يوم عن يوم ؟ ولا نحاول على الاقل ننول شرف المحاولة لجيل هيكون فيه ولادنا
شرفت يا اسلام ونورت المدونة المهجورة كعادتك دائما
يا مصر اكتب إليكي رسائلي
بمناسبة حلول شهر رمضان الكريم والعيد وكل مناسبة جميلة بتعدى علينا اهديك الف شكر وارق تحية
Daktara
اه حلم جميل بس يا ريت يكون مش بتاعى لوحدى او يشاركنى فيه ناس كتير يمكن يتحول لحقيقة
مش بعيد لان كل حاجة صعبة كانت بتبدأ بحلم ومع المحاولة بتتحول لوافع
شرفتنا
دعوه
يسعدنا ان نسمع تعليقاتكم
على ما نطرحه من موضوعات فى برنامجنا الأذاعى وهو الأول فى الشرق الأوسط عن النت والمدونات من الأذاعه الرئيسيه لمصر ....موضوعاتنا تطرح فى مدونتنا...وتذاع التعليقات التى تكتبونها فى حلقات البرنامج وهو يذاع يوميا عذا الجمعه التاسعه وعشر دقائق صباحا على موجات أذاعة البرنامج العام
ونرحب بنشر بعض موضوعات مدونتك المتميزه
المدونه
http://netonradio.blogspot.com
من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
Happy New Year....
النظرة الدونية للاّخر
و
أشياء كثيرة
أرى أن تلك هى المسألة
النظرة الدونية التى تنبع من مجرد أن الاّخر مختلف فى الجنس أو العرق أو الديانة واّه من الديانة يا عزيزتى فى مجتمع تزداد فيه نسبة الامية وأنصاف المتعلمين وتقل فيه القدوة الحسنة
فبعيدا عن كل الوان التشائم
المستقبل ينتمى الى من هم مثلك يا توتا
المستقبل ينتمى الى أولائك الذين يؤمنون بروعة أحلامهم
اين انتي..؟؟
أفتقد كلماتك
خالص مودتي
maged stephen
اشكرك على كلماتك الرقيقة
نعم المستقبل لمن يؤمن بالعدل حتى ولو حلم يتمنى تحقيقة واتمنى ان اكون فى هذا الركب لكن مع مئات الراغبين فى تحقيق احلامهم
كما قلت النظرة الدونية والمشكلة انها فى كل الطبقات من متعلميها الى من لا يعرفون قراءة الكلمات والعكس ايضا ان من يملك شعور العدل متواجد فى كل تلك الطبقات ايضا فظننت انها غرس التربية وموروثات المجتمع وكلها تحتاج الى تعديل من ايادى كثيرة متحدة
اشكرك مرة اخرى
ايمن
ياااه كم افتقدك ايضا ايها الصديق
يبدو ان ايام الجيش انتهت بسلام اتمنى ذلك
انا ايضا افتقد العالم التدوينى غير انى شفيت من ادمانى ولا ارغب العودة ولكن عدت بهذه التدوينة لانى ظننت ان مشاركتى حلمى معكم واجب وفرض
دمت بخير دائما
لسه جاي من مدونة
The Lost Princess
هناك دعوة للتوقيع على وثيقة تفكيك اسرائيل
وجيت هنا لقيت دعوة لتوثيق الترابط بين شعب مصر
عجبني هنا ان الدعوة اكثر فائدة من التوقيع هناك
افضل ان اوثق هنا
قبل ان افكك هناك
تحياتي
مرحباً
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.
قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/147
يمكنك متابعة باقى مدونات تدوينة دوت كوم على الرابط التالى:
http://www.tadwina.com
لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.
و لكم جزيل الشكر،
فريق عمل تدوينة دوت كوم.
http://www.tadwina.com
الشعب يريد اسقاط النظام
كلام جميل ومواضيع ممتاذة
ديما للامام
اختكم توتا
Post a Comment
Subscribe to Post Comments [Atom]
<< Home