تاج وتاج ومعرفش اقول ايه

ولف التاج ووصلنى من الغاليين

وصلنى تاج هعرف اجاوب عنه من حلم وذو النون وتاج تانى ده غير التاج الاولانى مش هعرف اجاوب عنه من شهروزة وزنجولا والمهاجر المختفى فى ظروف غامضة ومش عايزة حد يزعل منى

لوحدى ومن غير اى تعذيب هجلس على كرسى الاعتراف ومحدش يطفى سجاير ولا يمد ايده هقول كل حاجة

التاج بيقول ايه الخمس حاجات اللى محدش يعرفهم عنى ؟

خمسة بس والله اللى عمل التاج ده راجل طيب جدا ده الواحد من كتر ما بيخبى مش عارف يقول ايه ولا ايه

المهم هنوع بين مواقف وبين حاجات انسانية وصفية

1-اول حاجة فعلا محدش خالص يعرفها غير المدونون هى انى بدون وعندى مدونة ولا اسرتى ولا اصحابى المقربين ولا اى حد ليه بيه علاقة مباشرة يعرف الموضوع ده وفى الغالب اساسا محدش منهم يعرف يعنى ايه تدوين

ليه بقى مش عايزة اى قيد او اى رقابة عايزة اكتب براحتى من غير ما اى حد من اللى اعرفهم يحجمنى او يكون عامل زى اللى قاعد فى دماغى من جوه مخلينى بفكر فى رأيه ونقده كل لما اكتب كلمة او تعليق

2-وانا فى ابتدائى مامتى حبيبتى كان عندها فستانين مش بحبهم ابدا واحد كان روز والتانى بوستاج وكل لما تلبسهم شكلها بيكون زى الستات الكبار فى السن وكل ما قولها وحش يا ماما عليكى ولا كأنى بتكلم

الموضوع ده محدش فى الدنيا يعرفه غير انا واختى

روحنا عملنا ايه بقى ماما فى الشغل ومش عارفة حاجة والست طيبة جدا واميرة قوى جبنا الفستانين وخرمناهم بطريقة غريبة شوية بالمقص بشكل عشوائى

وكتمنا على الخبر خالص وماما جات تلبس واحد لاقيته مخرم ركنته بحسن نية بصراحة وبعدها بمدة شافت التانى وشرحه بقولكم اميرة ولا على بالها

بس ايه كل لما تيجى مناسبة بعد كل السنين دى اقول لاختى وحياة الفستان ولا نسيتى ونضحك لما نفطس ولغاية دلوقتى ماما متعرفش حاجة برده ولا بابا لما سألها هى ليه مش بتلبسهم بصراحة العيلة دى غريبة جدا محدش اساسا عنده دقة ملاحظة يعنى ممكن حد غريب يدخل يا خد اى حاجة ويخرج وبعد ساعتين حد يفتكر ان كان فى حد هنا باين كده

3- وانا فى ابتدائى واعدادى وثانوى كنت مشاركة فى كل النشاطات فى المدرسة من المرشدات للاذاعة للبنج بونج لفريق المواهب الفنية

بصراحة كنت مش مخلية نفسى فى حاجة خالص من فضلكم محدش يبص على التدوينات لان دى اسلوب كتابة ملهوش دعوة باسلوبى الشخصى

المهم فى المرشدات عندى مهمة انى اولع نار من غير كبريت بالطريقة الملعونة بالاحتكاك وساعة ومفيش نتيجة وذهقت فعلا ومش عارفة مين اللى اخترع الفكرة دى طنشتها طبعا وفكرت فى الفكرة الاسوء بتاعة العدسة المقعرة توجهها للشمس وتحط قدامها ورقة لغاية لما الورقة تشتعل على مين لا الورقة ولعت وانا اتخنقت

سيبت المكان ورسمت ابتسامة بريئة ورحت لمدرس واقف بيكلم زميله على بعد كيلو استاذ من فضل حضرتك كابتن حمدى بيسألك معاك كبريت علشان عايز يشرب سيجارة

بهدوء ادانى علبة مش عارفة ليه مكنتش بدخن بدل وجع القلب ده

وولعت النار طبعا وبعدها غنينا اغنية مسخرة من ضمن كلامتها ان المرشدات بيولعوا النار كده من غير عفار ومحدش يعرف العملة دى بصراحة الا انا

4- انا توتا بقى محدش تقريبا يعرف انى بخاف جدا من الاماكن العالية ودايما ابعد عنها ومقدرش ابص مباشرة لتحت ممكن افقى لكن لتحت صعب قوى ولانى دايما بعمل نفسى شجيع السيما اللى مش بيهمه حاجة مقدرش اقول لحد كده

كنا بندور مرة على شقة واختار اخويا شقة فى الدور التاسع هايلة ويلا نروح نشوفها طبعا روحت بدون اى تعليق الشقة مش بطالة بس انا اللى ظروفى هى اللى بطالة

بس طلعت كل القطط الفاطسة فيها وكمان افرض النور اتقطع يا جماعة نطلع ازاى ولا نتحبس بقى فوق فى العلالى كده

مش بالذمة عندى حق

5- محدش يعرف انى مش بحب الادوية خالص وممكن افضل اعانى مع المرض كتير وابعد عن الدواء لاخر لحظة وبعد معاناه استسلم واخد علاج ومستحيل اكمله محدش من اللى يعرف انا بشتغل فى ايه يفتح بوقه ويتريق من الاساس

اما بخصوص الحقن ادى كل الناس حقن ومعنديش اى مشكلة لكن من عاشر المستحيلات ان حد يدينى حقنة على جثتنى وكأن الشكة دى هتموتنى مع انى عادى مشوهة جروح وحروق من المطبخ لكن الحقنة مفزعة بالنسبة ليه وبرده مقدرش اقول لحد اصل فكرة شجيع السيما مسيطرة عليه قوى

بصراحة فى حاجات تانى كتير بس كده اخدت كرسى الاعتراف كتير وده ايجار بيدفعله يومية للداخلية ومنحبش نطول عليهم علشان هما ناس ذوق ذوق ذوق وهنبعت الكرسى والتاج عليه لمين بقى

نبعته للحج جرجس

والنديم عمر

وللاميرة اوسا

ولزنزانة هانم اللى مديانى لقب هانم

ولجدو

واخيرا لعشتار

فى ناس كتير عايزة اعرف عنهم كتير لكن التاج هيلف وهنعرف المستخبى عند كل واحد

وحياة اغلى حاجة عندكم ترحمونى من التاج وخلونى مقضيها تدوين وخنقاكم تعليقات واللى جدع يفرفر من تحت ايدى