My Photo
Name:
Location: cairo, Egypt

Saturday, February 03, 2007

تاج وتاج ومعرفش اقول ايه


ولف التاج ووصلنى من الغاليين

وصلنى تاج هعرف اجاوب عنه من حلم وذو النون وتاج تانى ده غير التاج الاولانى مش هعرف اجاوب عنه من شهروزة وزنجولا والمهاجر المختفى فى ظروف غامضة ومش عايزة حد يزعل منى

لوحدى ومن غير اى تعذيب هجلس على كرسى الاعتراف ومحدش يطفى سجاير ولا يمد ايده هقول كل حاجة


التاج بيقول ايه الخمس حاجات اللى محدش يعرفهم عنى ؟

خمسة بس والله اللى عمل التاج ده راجل طيب جدا ده الواحد من كتر ما بيخبى مش عارف يقول ايه ولا ايه

المهم هنوع بين مواقف وبين حاجات انسانية وصفية

1-اول حاجة فعلا محدش خالص يعرفها غير المدونون هى انى بدون وعندى مدونة ولا اسرتى ولا اصحابى المقربين ولا اى حد ليه بيه علاقة مباشرة يعرف الموضوع ده وفى الغالب اساسا محدش منهم يعرف يعنى ايه تدوين

ليه بقى مش عايزة اى قيد او اى رقابة عايزة اكتب براحتى من غير ما اى حد من اللى اعرفهم يحجمنى او يكون عامل زى اللى قاعد فى دماغى من جوه مخلينى بفكر فى رأيه ونقده كل لما اكتب كلمة او تعليق

2-وانا فى ابتدائى مامتى حبيبتى كان عندها فستانين مش بحبهم ابدا واحد كان روز والتانى بوستاج وكل لما تلبسهم شكلها بيكون زى الستات الكبار فى السن وكل ما قولها وحش يا ماما عليكى ولا كأنى بتكلم

الموضوع ده محدش فى الدنيا يعرفه غير انا واختى

روحنا عملنا ايه بقى ماما فى الشغل ومش عارفة حاجة والست طيبة جدا واميرة قوى جبنا الفستانين وخرمناهم بطريقة غريبة شوية بالمقص بشكل عشوائى
وكتمنا على الخبر خالص وماما جات تلبس واحد لاقيته مخرم ركنته بحسن نية بصراحة وبعدها بمدة شافت التانى وشرحه بقولكم اميرة ولا على بالها
بس ايه كل لما تيجى مناسبة بعد كل السنين دى اقول لاختى وحياة الفستان ولا نسيتى ونضحك لما نفطس ولغاية دلوقتى ماما متعرفش حاجة برده ولا بابا لما سألها هى ليه مش بتلبسهم بصراحة العيلة دى غريبة جدا محدش اساسا عنده دقة ملاحظة يعنى ممكن حد غريب يدخل يا خد اى حاجة ويخرج وبعد ساعتين حد يفتكر ان كان فى حد هنا باين كده


3- وانا فى ابتدائى واعدادى وثانوى كنت مشاركة فى كل النشاطات فى المدرسة من المرشدات للاذاعة للبنج بونج لفريق المواهب الفنية
بصراحة كنت مش مخلية نفسى فى حاجة خالص من فضلكم محدش يبص على التدوينات لان دى اسلوب كتابة ملهوش دعوة باسلوبى الشخصى
المهم فى المرشدات عندى مهمة انى اولع نار من غير كبريت بالطريقة الملعونة بالاحتكاك وساعة ومفيش نتيجة وذهقت فعلا ومش عارفة مين اللى اخترع الفكرة دى طنشتها طبعا وفكرت فى الفكرة الاسوء بتاعة العدسة المقعرة توجهها للشمس وتحط قدامها ورقة لغاية لما الورقة تشتعل على مين لا الورقة ولعت وانا اتخنقت
سيبت المكان ورسمت ابتسامة بريئة ورحت لمدرس واقف بيكلم زميله على بعد كيلو استاذ من فضل حضرتك كابتن حمدى بيسألك معاك كبريت علشان عايز يشرب سيجارة

بهدوء ادانى علبة مش عارفة ليه مكنتش بدخن بدل وجع القلب ده

وولعت النار طبعا وبعدها غنينا اغنية مسخرة من ضمن كلامتها ان المرشدات بيولعوا النار كده من غير عفار ومحدش يعرف العملة دى بصراحة الا انا


4- انا توتا بقى محدش تقريبا يعرف انى بخاف جدا من الاماكن العالية ودايما ابعد عنها ومقدرش ابص مباشرة لتحت ممكن افقى لكن لتحت صعب قوى ولانى دايما بعمل نفسى شجيع السيما اللى مش بيهمه حاجة مقدرش اقول لحد كده

كنا بندور مرة على شقة واختار اخويا شقة فى الدور التاسع هايلة ويلا نروح نشوفها طبعا روحت بدون اى تعليق الشقة مش بطالة بس انا اللى ظروفى هى اللى بطالة

بس طلعت كل القطط الفاطسة فيها وكمان افرض النور اتقطع يا جماعة نطلع ازاى ولا نتحبس بقى فوق فى العلالى كده

مش بالذمة عندى حق


5- محدش يعرف انى مش بحب الادوية خالص وممكن افضل اعانى مع المرض كتير وابعد عن الدواء لاخر لحظة وبعد معاناه استسلم واخد علاج ومستحيل اكمله محدش من اللى يعرف انا بشتغل فى ايه يفتح بوقه ويتريق من الاساس

اما بخصوص الحقن ادى كل الناس حقن ومعنديش اى مشكلة لكن من عاشر المستحيلات ان حد يدينى حقنة على جثتنى وكأن الشكة دى هتموتنى مع انى عادى مشوهة جروح وحروق من المطبخ لكن الحقنة مفزعة بالنسبة ليه وبرده مقدرش اقول لحد اصل فكرة شجيع السيما مسيطرة عليه قوى


بصراحة فى حاجات تانى كتير بس كده اخدت كرسى الاعتراف كتير وده ايجار بيدفعله يومية للداخلية ومنحبش نطول عليهم علشان هما ناس ذوق ذوق ذوق وهنبعت الكرسى والتاج عليه لمين بقى


نبعته للحج جرجس

والنديم عمر

وللاميرة اوسا

ولزنزانة هانم اللى مديانى لقب هانم
ولجدو
واخيرا لعشتار

فى ناس كتير عايزة اعرف عنهم كتير لكن التاج هيلف وهنعرف المستخبى عند كل واحد

وحياة اغلى حاجة عندكم ترحمونى من التاج وخلونى مقضيها تدوين وخنقاكم تعليقات واللى جدع يفرفر من تحت ايدى

91 Comments:

Blogger abourrisha said...

العزيزة.....توتة

صحيح فيه حاجات كثير مستخبيه وهاتفضل مستخبية
بس أنا حاسس إنه كان ممكن تقولي لنا اكثر من كده

وبعدين حاجة غريبة إن مفيش حد من أهلك وأصحباك يعرفوا إنك مدونة ليه

أنا عن نفسي با عرف أهلي كلهم لأن فيه حاجات هم مكانوش يعرفوها وآن الآوان إنهم يعرفوها

على فكرة طيبة الأهل وإحساسهم إن البيت أمان ولا يمكن يفكروا إن حد جوه البيت أو من خارج البيت يمكنه إنه يعمل شئ غير عادي
أفتكر إن ده موجود في معظم البيوت المصرية


تحياتي أيتها الرائعة

11:07 AM  
Blogger raspoutine said...

انا برضه جالى تاج نت كام يوم وجاوبت عليه النهارده
بس انا كنت عايز اعرف مين اللى بدع اللعبه دى عشاااااااااااااان اشكرررررررره واقوله متشكرين يا سيدنا

11:08 AM  
Blogger ذو النون المصري said...

اولا احب اسجل شكري للاستجابه في الرد علي التاج و اسجل سعادتي مع راسبوتين بفكرة التاج و اوجه شكري لصاحب هذه الفكره
لانها فعلا اخرجت بعض ما كنا نخبئه و بها نعرف اكثر عن المدونين زملائنا المدونين الذيننعرفهم عن بعد
انا سعيد جدا بالفضفضه التي قراتها لكي و للجميع من قبل و سعدت كذلك بفضفضتي انا شخصيا
لكي تحياتي

12:29 PM  
Blogger tamer said...

كدة ياتوتا تلعبى بالنار طيب ماشى انا لازم اعرف فين البيت واقولهم كل حاجة هعترف عليك واقول انك مدونة وبتلعبى بالنار وانك اللى قطعتى هدوم مامتك دة انا هقول كلام ههههههههههههههه

كلامك جميل لانة صادق وكل ما يخرج من القلب يصل الى القلوب دون حواجز او قيود



على فكرة انا كملت القصة وعايز رايك

تحياتى

12:56 PM  
Blogger Epitaph said...

looooool

:)) GeMini!
lol

زي العسل بس موضوع الحقن ده انا برضه كدة
اشوفها من هنا.. اقعد اعيط ههههه

بس كنتي شقية يا توتا و انتي صغيرة

:)

1:42 PM  
Blogger hebaz said...

هىهى حلو أوى موضوع الفساتبن دة
مامتك طيبة أوى ربنا يخليهالك:)

1:50 PM  
Blogger Malk Almasria said...

عزيزتى توتة
والله انا بدعيلك ربنا يكون فى عونك على الاسئلة دى وبدعى انى متحطش فى نفس الموقف

تحياتى

ملك المصرية

1:56 PM  
Blogger ادم المصري said...

اخدتي التاج ؟
احسن
هههههههههههههههه
فرحان فيكي

3:06 PM  
Blogger hosnysoliman said...

توتا انا نزلت لوح تانى ل جودوورد اذا حبتى تشوفيها وسيبينى دلوقتى مع التاج الاخير بتاعك

3:23 PM  
Blogger hosnysoliman said...

توتا على فكره انتى توتا اللى اناعرفتها من غير تاج نفس الشخصيه بتاعة المدونات الاسلوب طريقة الكتابه هى طريقة الكلام والفكر..بس على فكره اللى اخترع المدونه دى كان قصده اكتر من كده
هو قال 5 حاجات ما حدش يعرفهم غيرك..هو كان اشياء شخصيه ممكن الانسان منا يكون عنده حرج او اسف او ندم على انه يقولهم وما اعتقدش انا حد منا حيكون عنده الجراءه انه بفصح عن مكنونات من هو كاره حتى انه يذكرها بينه وبين نفسه

3:35 PM  
Blogger mansourawy said...

تعرفى انا ندمان فعلا انى عرفت ناس قريبين منى بعنوان مدونتى
بس خير شووية وغير العنوان
وبالنسبة
لموقفك من الادوية زى حلاتى
شغلى كله ادوية ف ادوية
وممدش ايدى عليهم لو شخصى الا عند الضرورة الملحة جدا
تحياتى وسعدت بقراية اعترفاتك وعايزين كمان لو فى
قولى محدش شايف حاجه متقلقيش

4:25 PM  
Blogger alnadeem said...

زي العسل يا توتا والله
علي فكره انا برضه بخاف من الأماكن المرتفعه
سلام
وميرسشي يا اختي علي تسليمك التاج لحضرتي بس انتي كده بتحرجيني لأن أكتر من حد بعتهولي واعتذرت
تحياتي وكلميني

6:00 PM  
Blogger Reformer1976 said...

رأيت في هذا التاج بإمضاء توتا صرخة بتقول يا اخوانا ما تحطونيش في دماغكوا في قالب واحد وتقرروا إن دي أنا... أنا جوايا اتساع وتنوع أكبر بكتير من إني أتحد في تنميط محدود جوة دماغ أي حد... بس جميل بجد كشفك عن جوانب متعددة في شخصيتك الرائعة لم نكن نعلمها عنك... إنتي عارفة إن ف مرات الناس بترتاح لتصنيف بعضها البعض في قوالب جاهزة وبيبقى صعب إنهم يدركوا مدى الثراء والتنوع اللي ممكن يكون موجود جوة نفس الشخص... بوست آخر لا يقل أهمية ودلالة في رحلتك التدوينية عن سابقيه... وأسلوبك راقي كالعادة وجميل حتى وانت بتحكي عن شقاواتك... أول ما قريت الحادثة بتاع تقطيع فستانين ماما افتكرت على طول فاتن حمامة في الخيط الرفيع وهي بتقطع هدوم خالد الذكر محمود ياسين... ههههههههه واضح إن الفيلم دا ربى أجيال

نياهههههاهههاااا

6:11 PM  
Blogger elkamhawi said...

جامدة الخمس حاجات
وقشطة على الصراحة

6:27 PM  
Blogger عاشقة الوطن said...

توتا العزيزة

تصدقى التاج ده نحفة
وخلتينى اضحك اوى
انتى دمك خفيف مووووت
وبعدين ايه حكاية فساتين مامتك ديه ده انتم عليكم افكار
ههههههههه

وبعدين بتضحكى على الاستاذ وتخدى منه الكبريت
والله أنتى عسل

1:44 AM  
Blogger mano said...

This comment has been removed by the author.

2:09 AM  
Blogger mano said...

توتا الجميله

انا كمان عندى رعب من الحقن
و لو بموت مش ممكن آخد حقنه
بس ضحكتينى قوى على حكاية الفستان

2:10 AM  
Blogger tota said...

ابا ريشة الجميل جدا
طبعا هو انا مش اذكى اخواتى يبقى لازم اخبى امال هقول كل حاجة ابدا

الحقيقة دى برده حاجة ميعرفهاش حد انا بحترم الخصوصية جدا جدا وممكن ناس تفتكر لانى مش بسأل اسئلة واستفسر انى بكون مش مهتمة بالعكس انا بحترم رغبة الاخر فى عدم الكلام وبافترض انه لو عايز يتكلم هيتكلم من غير اسئلة وبحب الطريقة دى فى التعامل معايا
وبعتبر المدونة شىء خاص مش عايزة حد يتدخل فيه ويقولى اى تعديل عايزاه يكون انا علشان كده مش قايلة لحد

البيت عندى مش طيبة ده بعيد عنك مفيش ملاحظة بالمرة انا الوحيدة اللى فى البيت مهووسة ملاحظة واى حاجة تتغير او تتنقل من مكانها انا لوحدى اللى اكتشف الباقيين ولا هما هنا
البيت ماشى فى نزعة الزهايمر غريبة

تحياتى واشكرك على متابعتك دايما ليه وبحب وجودك عندى بيحسسنى انى صالحة لكل جيل حتى جيل العظماء
تحياتى

2:42 AM  
Blogger tota said...

راسبوتين
حد ابن حلالالالالالالالالال ربنا يديله على اد نيته ويرزقه بتاج يطلع عليه القديم والجديد وما يعرفش يفرفر منه زى الدبيحة ليلة العيد

تحياتى وهروح اشوف اعترافاتك

2:43 AM  
Blogger tota said...

ذو النون
انت بالذات انا عارفة ان الردود دى ليك غير متوقعة
عارفة ان تخيلك كان هيروح لجزء فلسفى تانى او تصرفات مش صبيانية او هوجاء
علشان كده حبيت اقول الجزء غير التدوينى ,الاسلوب الشخصى انا بجنانى وضحكى وهزارى الصورة المخالفة للتدوين

مفيهاش اى حكمة او عظة مجرد ثرثرة حبيت اقولها

تحياتى

2:46 AM  
Blogger tota said...

تامر
والله يا تامر انا نقيت الحاجات اللى مفيهاش فضايح حرصا على المدونين اللى سنهم اقل من 18 سنة

وعلشان الرقابة والمصنفات حضرتك

لكن مين هيقولك على العنوان هوانا ساكنة فين انا فى بيت فى الشارع ملهوش رقم

زورتك طبعا التعليقة بتاعة القصة قتلتنى وكويس انك ما طولتش

تحياتى

2:48 AM  
Blogger tota said...

ايبى
انتى المفروض اللى عارفة ومخمنة كل البلاوى ما انت عرفتى كل حاجة من غير ما اتكلم

يا جماعة خافوا من البنوتة دى بتقرى الابراج وتقول العمايل لوحدها من غير ما حد يتكلم

ومش هقول اى حاجة تانى تلاقيكى عارفة كل المصايب بتاعتى
انا هسكت بدل الفضايح

تحياتى

2:50 AM  
Blogger tota said...

hebaz
يا رب يخليهالى يا رب
عارفة اطيب قلب فى الدنيا كلها ومتعرفش تكدب ولا تخبى عارفة الست امينة مع سى السيد كل مرة تعمل عملة اقولها زى الشاطرة روحى لسى السيد وقوليله اصل السوارس صدمتنى وكل عمايلها لازم تعترف بيها رغم كل الاحتياطات والتنبيهات بيوصل كله لسى السيد بدون مجهود

بس حتة سكرة

تحياتى

3:01 AM  
Blogger tota said...

ملك
هو انتى لسه مجالكيش التاج
لا يا جميلة انا قلت ان حبايبك كتير وعايزين يحطوكى على كرسى الاعتراف

اهداء خاص يا جماهة لملك بالاجابة على هذا التاج

ومفيش اى وسيلة للهرب منه
كلنا لها

تحياتى

3:02 AM  
Blogger tota said...

ادم

كده يا ادم
ماشى يوم ليك ويوم عليك يا ادم وههتروح من خلق الله فين

نورت
تحياتى

3:03 AM  
Blogger tota said...

حسنى

حالا هكون عندك

اما بخصوص الاسلوب طمنتنى على نفسى ان انا هى انا رغم اختلاف الاسلوب واى ان كان الاسلوب هو كتابى لا يرتبط بالفكر او الشخصية التى لا تتغير مهما تغير الاسلوب
تمام كده
تحياتى

3:08 AM  
Blogger tota said...

منصوراوى

شوفت بقى الغلطة دى اصلى محبتش اقع فيها
انت متعرفش التاريخ بتاعى انا فضلت اعلق الاول شهور علشان اتعلم واستفيد ولاقيت ان انسب حاجة هو ان الواحد ما يدخلش اى حد فى الموضوع ده بس برده فى غلطة وقعت فيها كنت افضل دايما شخصيتى تكون خفية بس وقعت واتعرفت على مدونين كتير
البارعة جدا فى الموضوع ده الملكة المتوجة اوسة ناجحة تماما اللهم لا حسد فى الموضوع ده
بس ليها حل
اعمل مدونة خفية تانى بسيطة جدا ومحدش يعرفها
كل الحلول بالمجان فى التدوينة دى

تحياتى

3:11 AM  
Blogger tota said...

النديم

انت اللى عسل يا عمر

هربان ليه من حصة المصارحة انت عبقرى وهتعرف تنقى حاجات محايدة منها تكون سر وهى فى الواقع مش سر فظيع وسرك فى النهاية فى بييييييييييير

تشاركنا فى حاجة جديدة
بس انا نسيت اقول كمان الاماكن المغلقة بس مش قوى زى الارتفاعات
تحياتى

3:14 AM  
Blogger tota said...

الحج جرجس

مش بقولك رفيق فكرى
كان يبقى عيب عليك قوى لو مشفتش الصرخة ووراها التوقيع كنت هرفع عنك الرفقة واسميك اى حاجة تانى
فعلا السبب الوحيد لكتابة تدوينة من النوع ده هو كسر الرتابة التدوينية او الترنيمة الواحدة
ومستمرة كمان فى طريقة التعليق علشان تبقى الحبكة الدرامية

كأنى بقول والله بعرف اكتب بكل الطرق وانا بعرف اضحك واهرج وابقى عادى ما انا بنى ادمة مش مولودة مدونة

مصيبة لكون اتولدت فى ايدى كى بورد ومحدش قالى

تحياتى

3:18 AM  
Blogger tota said...

قمحاوى

والله انت اللى قشطة يا مان

انت فين يا عم من ساعة التدوينة اللى باللغات الاجنبية اللى معرفتهاش

تحياتى

3:18 AM  
Blogger tota said...

عاشقة الوطن
والله انتى اللى سكرة الصورة تحفة

اه شكلى فى يوم هعترف لامى على الموضوع ده بس تصورى فى اغلب المناسبات بجبلها هدايا ملابس زى ما يكون عندى عقدة انى عملت عملة سودة وانا صغيرة تصورى اول مرة اخد بالى انى بعمل كده
ادى علم النفس والقراية فيه واللى بيجيلنا من وراه

اوعى تلعبى بالكبريت دى كانت ظروف قاهرية

نورتى يا جميلة
تحياتى

3:21 AM  
Blogger tota said...

مانو

اه فظيعة الفكرة دى من كام يوم روحت يا ستى اتبرع بالدم طبعا مش ابرة عادية بعيد عنك مسمار 5 سم ضخم انا شوفته وبدأت اتمتم وكل ما شوف حد بيصرخ بعد الشكة ارجع خطوة لورى لغاية ما جاه الدور بتاعى فاكرة اسماعيل ياسين فى البحرية ايوه يا عبد البحرررررررررر
وهبا من غير صوت منطقتش الا بعد دقيقة بس تعالى اتفرجى دون عن خلق الله كلهم دراعى واخد كل الوان الطيف فى مساحة 10 سم مربع

تكنى كلر اهو تغييير نيو لوك منهم لله الظلمة

تحياتى

3:25 AM  
Blogger غادة الكاميليا said...

توتا تعرفي كان نفسي اشترك في فريق الموسيقى في المدرسه واتعلماعزف على الاوركديون بس للاسف كل الات دى كانت مشحونه في حجرة التربيه الموسيقيه ولا حياة لمن تنادى
اجباتك جميله وصريحه زيك

11:10 AM  
Blogger توهة said...

مممممممم

اسرار حربيه خطيره

وموضوع شجيع السيما ده منتشر لا تقلقى

وتحياتى

4:37 PM  
Blogger Sharm said...

كل تاج واتى طيبة يا توتا

4:56 PM  
Anonymous عشتار said...

توتا العزيزة
انا بردو لم أعرف أهلي وأغلب أصدقائي بمدونتي لأن التدوين فية نوع من التعرية لشخصيتنا ,وفية الكثير من الاعترافات اللتي كشفها أمام الغرباء أسهل بكثير من كشفها أمام أحبائنا
اعترافات قد لا نقلها صراحة ولكن تقرأ ما بين سطورنا
شكرا لكشفك لنا الشقاوة الجميلة في شخصيتك , بس لا تحاولي معايا في موضوع التاج لأنة من الصعب جدا أن أتحدث عن نفسي أستطيع أن أقول لك فقط أنني من برج العقرب وهو من أكثر الأبراج غموضا وهكذا أنا أحب أن أترك لكم بعض الغموض وبامكانكم محاولة كشفة بين
سطور مدونتي
تحيات

11:47 PM  
Blogger tota said...

غادة

خسارة ان المدارس عندها الكلام ده رمزى مش للاستعمال فقط للفرجة والتخزين
لا الحقيقة ما اشتركتش فى الفريق بتاع العزف لكن الغناء كان شغال
فكرتينى بالذى مضى
اشكرك على وجودك
تحياتى

2:51 AM  
Blogger tota said...

توهة
ربنا يطمنك كنت فاكرانى لوحدى اصل الفكرة دى مخليانى احس انى هبقى مريضة نفسيا لان الواحد لازم يعترف بضعفه وما يضغطش على نفسه
يعنى اروح ادخل الهرم وانا بتخنق من الارتفاعات والاماكن المغلقة واحس انى بموت علشان مش قادرة اقول اصلى بخاف
لا اقول ارحم وبلاها شجيع السيما اللى هموت فداه

تحياتى يا جميلة

2:54 AM  
Blogger tota said...

شارم
وانت طيب ومنجيش لحد فى تاج تانى ويارب اخر التيجان

تحياتى

2:55 AM  
Blogger tota said...

الجميلة عشتار

ده كرسى الاعتراف مش بيوجع يا جميلة خالص زى شكة الدبوس
هتقولى حاجات بسيطة وانا عارفة ذكائك هيخليكى تقولى ايه
ما هو محدش فينا قال اللى فعلا عايز يخبيه
كلنا قولنا اللى احنا بس عايزين غيرنا يعرفه
ان كان التاج شقى فاحنا اشقى منه

تعالى متخفيش ده حتى مريح اكثر راحة من الحديدة اللى عند عمر

تحياتى

2:58 AM  
Anonymous Anonymous said...

سياده الاخت المواطنه

الف مبروك على المدونه
اينعم متأخر اوى بس فرحت لما شوفتها وشوفت الرجل بتعدى عليكى كتير ومنفعينك بتعليقات ترد الروح
على العموم يجعله عامر وان شاء الله نلائيلك افرع كتير فى كل حته ومبروك الافتتاح ونزل بوكيه ورد هنا ياجدع


محمد

7:35 AM  
Blogger توهة said...

ههههههههه
والله عندك حق


فليسقط شجيع السيمااااااا

3:03 PM  
Blogger Gid-Do - جدو said...

العزيزة توتا

بمناسبة خوفك من الاماكن المرتفعة ـ كنت فى زيارة صديق امريكانى محترف قفز بالمظلات ـ يعنى بيعمل فلوس من القفز بالمظلات بمصاحبة المبتدئين علشان يعلمهم وممكن يعمل اكتر من مائة قفزة يوميا ـ وكمان رجل اعمال ناجح ـ هذا الرجل قالى انة بيخاف يقف على سلم نقالى احسن يقع وانه بيخاف من الارتفاعات لكن عند القفز من الطائرة مبيكونش حولية حاجة تشعرة بالارتفاع ـ تحياتى

12:25 PM  
Blogger يا مصر اكتب إليكي رسائلي said...

الأخت العزيزة TOTA
يارب تكوني كارديولجي ـ عشان ابقى اشتكي ليكي براحتي شوية

شرفت بزيارتك العطرة ، أنا عارف اني مديون بتفسير الغيبة ، هانت إن شاء الكريم
ولأ طبعا الأمر في بيت بهية لم ينصلح ولم يقوّم بعد ، ولكن لن يفيد وجودي الأن ـ في الظروف اللي انا فيها ـ لأن شخصيتي يشوبها الأنانية وبعضا من التعصب ولن أكون سويّ النفس عند إبداء الرأي ، أنا حقيقي في دوامة تانية خالص أختي العزيزة ، ولا أستطيع ـ حالياً ـ إلا ان أرى تحت قدمي فقط .. أمور صعبة وامتحان مرير بمر بيه لأول مرة ومحتاج تركيز فية هو وبس ، حتى لا تتطور أخطاءاً لتصبح كرونيكال.
لكن
زمن وبيمر ، وانا برتب الخيمة بس مش ها غيب تاني كتير كدا. تحياتي إليكي والأصدقاء.

10:45 PM  
Blogger saso said...

اولا مكنتش اعرف كل ده انك بقيتي تدوني
:$
مبروك متأخرة موووت
عن التاج ..انا عندي في البيت نفس الكلام كل محاولاتي اني اكون شقية محدش حس بيها لحد مابقيت هادية من باب الاحباط
:)

التاج حلو هاروح بقي اخد جولة واشوف اللي فاتني
مبروك يا اجمل توتة كده هاعرف رأيك عن المواضيع من غير مالف علي تعليقاتك عند المدونين

1:05 AM  
Blogger بعدك على بالى said...

جميل التاج اللى كشف كتير عن شخصيتك والاهم فيها حجم ذكاءك و قدرتك على الخروج من اى مأزق زى مأزق التاج ، يعنى قلتى حاجات بس خبيتى الاكتر، وعموما اى حاجة منك حلوة ..
تحياتى ايتها الجميلة الغارقة فى متن الحكايا

1:57 AM  
Blogger ekraammalik said...

السلام عليكم

هي ليست الزيارة الاولى بس التعليق الاول.... تفاجأت باضافتي الى قائمة مدوناتك... ماتصورت اني اشوفني بعيد عن مدونتي... التفاته لطيفة منك يارقيقة ....

تعرفي انا لفت انتباهي مشاركتك في كل الانشطة لما كنت تلميذة وهذا يعني من وجهة نظري كم الطاقة الهائل اللي موجود جواك واللي مو عارفه توظفيه باي اتجاه... يمكن انتي من النوع اللي يحتاج مدير اعمال يعرفك بامكانياتك ويخليك تسلكي الطريق اللي تبدعي فيه

انا لا اقصد من ذلك انك لاتعرفين امكانياتك ولكنك مشتتة فهل مازلت هكذا؟ خليني اعرف من فضلك

تحياتي

2:14 AM  
Blogger tota said...

محمد
برغم انى ادين لك بفضل كبير فى التشجيع على التدوين الا ان يحزنى ابتعادك انت عن عالم التدوين

يعنى اذا حضرت الشياطين ذهبت الملائكة
واضح لان خبرتك اكبر منى انت عاصرت كل حاجة وزى ما انت شايف مجرد مبتدئة بتحاول

ميرسى على الزيارة وبوكيه الورد اللى عبق المكان فعلا هو وجودك
تحياتى يا اخى المواطن

2:30 AM  
Blogger tota said...

توهة
اه فليسقط ايوه ميت مرة
هى كام روح ده هى واحدة مفيش غيرها
تحياتى يا جميلة

2:32 AM  
Blogger tota said...

جدو الجميل

بصراحة يا جدو مش قادرة استوعب انى اعمل اللى عمله صاحبك يعنى اعتقد ممكن اصاب Heart attack
لكن اتذكر فى مرة فى شارم الشيخ وبتسلق جبل مش عالى ولا حاجة وبدأت ابص لتحت اصبت بهلع غير طبيعى صحيح اكملت لكن طبعا بسبب نظرية شجيع السيما اللى هتجيب اجلى فى يوم

لكن اقسمت ان لا اكررها مرة اخرى
رهاب الارتفاعات على ما يبدو مثل اى شىء يوجد به مراحل
انا مرحلة مش متطورة قوى

ميرسى على وجودك يا جدو اللى بيشرف المدونة

2:39 AM  
Blogger tota said...

يا صاحب الرسائل
ليك رسالة عتاب لكن ردك بوجودك كان له اثر جميل

يا عزيزى ينصلح حال بهية بوجود من يريد ان يصلحها ليس واحد فقط بل العديد فلا تفقد الامل

واعانك الله فى تجربتك التى اتمنى ان تخرج من صلبا تعرف ما تريد
لاسف مش كارديولوجى
CLINICAL PATHOLOGY
ومعتزلة ده كمان وبشتغل فى مجال تانى خالص

بس بسمع حلو قوى ولا اجدعها سيكولوجيست

شرفت ومنتظرة تدويناتك

2:44 AM  
Blogger tota said...

ساسو
لو تعرفى انى منتظرة تعليقاتك بفارغ الصبر مش هتصدقى
انت عارفة طبعا فضلك عليه

بس مكنتش قادرة اجى اقولك زورينى كنت عارفة انك هتيجى فى يوم
يهمنى اعرف رأيك
ومن فضلك لا تعاقبينى بان تضعى مواضيعى فى قالب واحد لانها سوف تتغير
اعرف ما يبدو لك لكن لا انوى اتخاذ اتجاه محدد
فيحزننى دائما فكرة قولبة المدون

تحياتى

2:47 AM  
Blogger tota said...

بعدك على بالى
انت دايما على بالى
وبفتقد تدويناتك وتعليقاتك
لكن ليكى من قلبى كل الدعاء

اه طبعا لاحظتى ان كرسى الاعتراف اللى قعدت عليه مجبش اللى جوه خالص زى ما كل واحد متوقع
اللى جوه لازم يفضل جوه والا ما فائدة الجزء المعتم علشان نخبى فيه اللى مش عايزين حد يعرفه

نورتى يا جميلة

2:50 AM  
Blogger tota said...

اكرام الجميلة
من قال ان اسمك بمدونتك فقط
انت معلقة ومشاركة رائعة فى مدونات اعزاء كثيرين وان كان اسمك قد اضاء القائمة فهو متأخر لكنه مضىء من قبل ذلك بكثير

ملاحظة جيدة ان حتى الان متعددة النشاط لانى باللفظ
Hyperactive
لم اكن اعرف سابقا كيف احظى بتنظيم الوقت والاداء لكن منذ التحقت بعملى فى شركة امريكيةقبل عشر سنين ( وهنا تجدين جيدا من يعرف كيف يستفيد من امكانياتك حتى يمتصها عن اخرها ) كان اول شىء تعلمته
Time managment & organization
ولا اخفيك انى مستمتعة بذلك جدا فاصبح من السهل عمل كل شىء ويبقى ايضا وقت لاشياء اخرى

سعيدة بوجودك وبكلماتك وبمحاولة التعرف

تحياتى

2:58 AM  
Blogger Yasser_best said...

تلك الأسرار الصغيرة التي نضعها في زاوية مطلمة من الذاكرة..تلح علينا دائماً كي تخرج إلى النور

نظن أحياناً أن عدم الكشف عن تلك الحكايات والتفاصيل الخاصة هو السياج الذي يحمينا.. لكن الذي يحمينا حقاً هو ألا نخشاها وألا نخاف من الآخرين

و"التاج" فرصة كي نقول ولو بعض ما نخفيه عن الآخرين..وربما عن أنفسنا

شخصياً..استمتعت بحكاياتك البسيطة من أيام الصبا.. لكنني أعرف أن نهرك أعمق بكثير

أنا في انتظار تدفق النهر

6:20 AM  
Blogger tota said...

العزيز ياسر
بالطبع لن يرحمنى من يستمتع بقراءة العمق
فحيلتى مكشوفة وان اشرت بطريقة صبيانية عن شقاوة الايام السابقة فلم افلح ان اجعل البوست ينطلى على المعلقين دون ذكر شىء
كما قلت يا عزيزى بداخل كل منا اشياء نخفيها عن الاخرين
لو اردنا ان نذكرها ما اخفيناها فى البقعة المظلمة بداخلنا حتى لا يعثر عليها احد والحق انه لن يعثر عليها احد

الحقيقة بما انها لحظات اعتراف لم اكن انوى بهذا البوست مكاشفة بقدر ما كان كسر ترنيمة الاسلوب ووضع حاجز مانع للقولبة والتصنيف
كمحاولة صارخة لرسالة انا غير اسلوبى فى الكتابة
واغلب الظن ان فكرة رسم فكرة من اسلوب الكتابة قد توحى لمن يقرأ التدوينات انى اشبه شخصية نفيسة هانم فى مسلسل ميزو :)

والله ممكن يا ياسر مين عارف
اشكرك على وجودك يا عزيزى والنهر لا يفيض بما فى داخله الا اذا امتلئ
تحياتى

6:59 AM  
Blogger bluestone said...

اعترافات كلها شقاوة يا توتا
مع انه يا اخي مايبانش عليكي :)
فكريني لما اشوفك المرة اللي جاية
نروح البرج :))))

بي إس: انا كمان عندي فوبيا مرضية من الحقن :)

تحياتي

12:42 PM  
Blogger يا مصر اكتب إليكي رسائلي said...

الأخت العزيزة TOTA
طبعا كنت اتمنى كارديولجي .. ولم أتوقع أبدا أن تكوني باتولجي دي يا نهارك ابيض .. بقا انتي يعني بتاعت 111 .. مش ممكن .. أنا عارف ان قلبك اقوى من رجال كتير ، همممممممم بس طبعا احلى ..
ـ عموما أختي العزيزة أنا سعيد اني هاكون تاني بينكم.
اه على فكرة ، الناس كلها بتقول كنتي ـ ماضي يعني ـ على وصف شقية دا ....
طيب عيني في عينك كدا ؟

11:17 PM  
Blogger Muhammad EL-Ashry said...

..
توتة
..
نهارك جميل
استمتعت بحكاياتك الشقية
وأساليبك الشهية في طفولتك
..
تبقى حياتنا مغلفة داخلنا
وإنّ أردنا البوح
لا نستطيع أن نتخطى الغلاف
المسكوت عنه يظل يؤرقنا دائما
ويدفعنا للبوح بأبسط الأشياء وليس أعمقها وأكثرها حفراً في الروح
..
خالص المحبة

2:33 AM  
Anonymous مختار العزيزي said...

looooool
أنا كمان باموت في جلدي وقلبي بيقع في ركبتي الشمال بسبب الأماكن العالية، يعني ابتداءا من بلكونة الدور التالت.

أنتي طبعا بتعملي كل بلوة وبلوة وفي الآخر لما الناس يبصولك يلاقو ملاك يا اخواتي:)))) أصل أنا كنت كده أيام ما كنت باحضر المدرسة لما كنت طالب مجتهد. سلام يا توتا يا عزيزة

4:12 AM  
Blogger tota said...

بلو ستون
ازيك يا جميلة واخيرا شرفتينى
شوفتى اه طبعا ولا هيبان عليه ما هو اللى بيعمل المصايب كده يبان على وشه البراءة والهدوء
ساعات كنت اشتغل مخ وبقية العيال صحابى العضلات

ايوه عايزة تودينى البرج وتغرغى بيه والحج جرجس ابدعتى فى طريقة التخلص منه عند عمر
وكده يبقى المدونين ارتاحو
ابدا لا يمكن انا على الارض مطلعش ابدا فوق

نورتى المدونة يا جميلة
تحياتى

4:39 AM  
Blogger tota said...

يا كاتب الرسايل

احب اطمنك انه حتى المهنه دى اعتزلتها من زمان وبشتغل فى مجال تانى من غير اذية لاى حد خالص بالعكس احنا الناس الذين يستفيدون من مرض الاخرين اقصى استفادة ومصائب قوم عند قوم فوائد

انا اللى منتظرة عودتك للتدوين

اه واخد بالك انت من صيغة الماضى بس معلش برده الزمان هدنى ومعدش فى حيل للشقاوة بقى على الضيق كده ومن غير عينى ما تيجى فى عينك علشان بالتأكيد بكدب
يموت الزمار وايديه بتلعب

تحياتى

4:43 AM  
Blogger tota said...

العزيز محمد

نهارك انت اللى سعيد
اكيد انا متفقة معاك وزى ما قت انى بعدت تماما عن الغرض الذى من اجله كان التاج
لم اكن انوى ان اكشف اشياء فما بداخلى ليس للكشف ولكن انا اكسر رتابة اسلوبى والترنيمة التدوينية التى انهجها بصورة مختلفة

ولكن اظهار بعض الصفات الشخصية التى قد لا يعرفها احد لان الاسلوب التدوينى يجعلنا نرسم صورة معينة عن المدون هى بالطبع ليست شخصيته

سعيدة بتواصلك
تحياتى

4:56 AM  
Blogger tota said...

مختااااااار
اهلا اهلا فى المدونة شرفت بيتنا المتواضع

اه انا زورتك فى الدور الاول فى المدونة لاقيتك زى حالاتى بتحب الارضى وملكش فى الادوار العالية
المشكلة ان شغلى فى الدور التامن وعندى واجهة كاملة زجاجية على الشارع يعنى حدودى نص الحجرة بتاعتى النص التانى من بعيد لبعيد

اه يا مختار زماااان ايام البراءة بقى دلوقتى ايام .... البراءة برده
مشيها كده وانت بصراحة لسه مجتهد انا احب اقول الحق ولو فى الدور العالى

نورت يا مختار
تحياتى

5:06 AM  
Blogger Scorpio™ said...

dear tota,

Thanx 4 those who send u this taag, i liked ur confessions specially the "naughty tota" it reminded me of my school days

greetings

10:17 AM  
Blogger أُكتب بالرصاص said...

هو ده الكلام

طلعي المستخبي
طلعي

بصراحة
مسئلة التيجان دي حلوة ،
ان الواحد يقرئها فقط
مش يحاوب عليها
لذلك انا باستمتع بقرائتها علشان اعرف المستخبي

وكل واحد له اسلوب في الاجابة صعب تلاقي اتنين متشابهين في اسلوب
وطريقة الاجابة نفسها تعبر عن طريقة المدون في الكتابة

وخصوصا
المتميزة
توتا
:)

10:39 PM  
Blogger smraa alnil said...

هههههههههههه
حتي عسولة وحكيمة وانتي في فضايحك
يا توتا دة كاس وداير علي الكل

بس انتي لئيمة اوي تبوظي فساتين مامتك عشان انتي مش بتحبيهم

يا عيني الست الطيبة دي
والله بيتعبوا معنا
ههههههههههههههههه

بس والله انتي عسل

1:03 AM  
Blogger tota said...

scorpio

شوفت اعترافات ليلية دى بس بتفكرك بشقاوة ايام المدارس هو انت بطلت شقاوة ولا ايه ؟ انا لسه مبطلتش يا عم اصلى لسه بدرس حتى لو دراسات عليا بس برده مرتبطين ببعض

اه اللى اخترع التاج منه لله بقى

تحياتى

2:32 AM  
Blogger tota said...

قلم رصاص

ايوه طبعا ما هو طول ما انت بعيد عن كرسى الاعتراف الدنيا حلوة لكن اول ما تقعد بقى وتبدأ جلسة التعذيب ويطفو فيك السجاير تقول مش لاعب

فى تاج مرسل لك من خلال التعليق ده و الكرسى هيتبعتلك على البيت ومصاريف الشحن علينا ومعاهم واحد من الداخلية وانت ونصيبك بقى

انطق اعترف بكل حاجة

ميرسى على وجودك وتعليقك
تحياتى

2:35 AM  
Blogger tota said...

سمورتى
شوفتى ايام الصبا والشباب لما كنت صغيرة كده قبل ما نموى يوقف

بس لسه فى حاجات شقاوات صغيرة من وقت للتالنى بس مش بعملها فى مامتى الحجة مش حمل شقاوة دلوقتى

نورتى يا جميلة
تحياتى

2:44 AM  
Blogger elkamhawi said...

اية فينك
محدش شايفك ليه

10:57 AM  
Blogger Sharm said...

هههههههههه

فكرتيني يا توتا بأول مرة اديت فيها حقنة لواحد .. بهدلته

8:31 PM  
Blogger SaRa said...

من الجميل معرفة الاخرين والدخول الى سراديب الافكار

عجبنى كلامك الصريح وسعيدة بمعرفتك عزيزتى توتا

8:23 AM  
Blogger tota said...

قمحاوى
انا اهو هروح فين قاعدة فى البلوج فى الدور الارضى
تحياتى

6:26 AM  
Blogger tota said...

شارم
لالالالالا انا من اول طلعة كنت محترفة ضرب حقن لكن اللى اعمله فى الناس محدش يعمله فيه
:) تحياتى

6:27 AM  
Blogger tota said...

سارة
انا اللى سعيدة بمعرفتك بس مدخلتيش جوه اوى ده كان الدور المفتوح لسه فى الدور المسحور يبان بس محدش عارف ايه جواه
تحياتى يا جميلة

6:29 AM  
Blogger Amira said...

جميل اوى البوست

انتى عارفة توتا ان اصعب كنابة لما الانسان يكتب عن نفسة

ربنا يوفقك

6:55 AM  
Blogger ana mean said...

بس ياترى توتا انتى قولتى على المستخبى كلة ولا كان احتيار منك البعض
على اى اساس كان الاختيار على اهمية الحدث فى حياتك ولا على اساس انة مجرد حدث حصل وخلاص

انتى شخصية رائعة

دومتى بخير

9:04 AM  
Blogger شــهــروزة said...

تووتى

أنا جيت أقرا
أخيرا ربنا أخد بايد الانترنت عندى والبلوج بتاعى
بلوجر مسابنيش الا لما عملت الجديد

يلاااا بقا حنعمل اية؟
حكم القوى

=========
أتاريكى مصيبة وانتى صغيرة
بس برضة زعلانة منك ومش حأقولك ليه لأنك عارفة

ماتجيبى بوسة؟؟
بس متقوليش للبت حفصة
نيااهاااهاااااا

10:19 AM  
Blogger tota said...

اميرة
كان صعب قوى تخرجى حاجات من الاعماق بس الحقيقة انا برده مكنتش جايبة غير اللى على الوش بس الباقى سبته فى الاعماق
حاولت اضحك عليكم بس على مين بصى على التعليقات وانت تعرفى انى فشلت
تحياتى

11:20 AM  
Blogger tota said...

ana mean
سؤال فى الصميم
مكنش فى اساس بنيت عليه الاختيار لان الهدف الخفى اللى انا علشانه كتبت مش انى احكى عن اسرارى اد ما اكسر الرتابة التدوينية اللى عندى ببوست طبيعى
اخترت فعلا حاجات محدش يعرفها لمجرد انها خطرت على بالى لكن فى حاجات تانية كتير بس لازم تفضل مكانها مدفونة

انت اللى انسان جميل لكن الحزن غالب عليك كتير

11:23 AM  
Blogger tota said...

شهروزتى

اخيرا يا جميلة شوفتى شقاوة ابلة الناظرة وهى صغيرة
عارفة انتى زعلانة ليه بس انتى عارفة اى مقدرش على زعلك خالص
بس فهمتى طبعا وجهه نظرى يا جميلة
وموووه ولا يهمنى خا لص انت مضمون يا جميل
تحياتى

11:25 AM  
Blogger Nada said...

عزيزتي توتة
بصراحة بصراحة
انتي عرفتي تهربي من التاج بلباقة
مرضيتيش تكسفي حد فقبلتي الدعوة
بس ............................................................................
مش كدة يا توتة
ولا أنا غلطانة؟؟؟؟
تحياتي

5:50 AM  
Blogger المطالع بن الكتاب said...

الاخوة الكرام

نحن الفلسطينيين محاصرين بحصارين:حصار الاحتلال وحصار تعليقاتكم

فتعليقاتكم مكتوبة بلهجة عامية تجعل فهمها مثل تجاوز السور العازل الذي بناه الاحتلال

ان استعمال العامية يؤدي الى تشظي الوعي الجمعي للعرب و تفرقهم الة مدونات متناحرة

نحن نحاول طوال الوقت حفر انفاق بيننا و بينكم لتجاوز الحدود الاحتلالية و اللغوية , ولكن حسنيكم المبارك و لغتكم العامية تكشفان الانفاق تلو الانفاق


ونحن لا حول لنا و لا قوة و بالله المستعان

كان معكم المطالع بن الكتاب

فاصل اعلاني نرجع بعدها لحصاد اليوم

"كتبت للتو مقالا عن الزمن تلخيصا لكتاب "تضاريس الزمن- كيف تتعامل الحضارات مع الزمن- روبرت ليفاين" وتجدونه على مدونة مبادرتنا
اهلا بكم "

8:22 PM  
Blogger zenzana said...

يا هانم انا كل ما عدي الاقي البوست هو هو وازوغ معلقش عشان متزنقش في الكورنر بتاع التاج لكن ما باليد حيلة

بصرة يا ستو هانوم انا كمان بخاف من الاماكن العالية والمغلقة ومستعملتش اليفاتور الا علي كبر واجباري وبكره الانفاق وبركب المترو بالعافية وتلاقيني غرقت ف عرقي وانا راكبة تاكسي فوق كوبري، وساكنة ف لدور التلت واستحالة ابص ع الشارع
بالنسبة للتاج انا بحاول ارتب انهي اخف خمسة ممكن احكيهم
لكن جاية ف السكة

3:08 AM  
Blogger tota said...

ندى
انت صح بالطبع لم يكن هناك اى مكاشفة بقدر ما هو تغيير فى القالب التدوينى
لا انوى كشف اسرار عبر العالم الافتراضى الذى اصبح حقيقى الى ابعد الحدود
تحياتى يا جميلة

5:35 AM  
Blogger tota said...

المطالع بن الكتاب

رفقا يا عزيزى
فما ان كسرت القالب التدوينى عبر تدوينة بسيطة بلغة عامية حتى تلقيت تعليقك
يا عزيزى لو قرأت باقى التدوينات لعرفت انى من عشاق اللغة العربية تعليقا وتدوينا
ربما حاولت كسر القالب والاسلوب والطريقة

اعدك بالزيارة ربما تبادل المواقع بين مدون ومعلق يساهم فى حفر نفق اتصال جديد
تحياتى

5:40 AM  
Blogger tota said...

يا راندا هانم
هتهربى تروحى منى فين
هتقعدى على كرسى الاعتراف
بس شوفتى الذعر بتاع الارتفاعات ده يظهر والله اعلم ده ليه علاقة بالتدوين
الكل بيخاف منه
اهلا فى نادى المرتفعات المنخفضة
تحياتى

5:42 AM  
Anonymous مختار العزيزي said...

توتا، هو انتي سألتيني عن ميشيل فوكو قبل كده؟ عموما ادخلي علي الايميل بتاعك انا بعتلك كتابه بتاع حفريات المعرفة لقيته بالصدفة. لو مش انتي اللي سألتيني يبقي معلش انا اسف علي الازعاج

5:59 AM  
Blogger tota said...

Mokhtar
Yes me
thank you very much , you have good memory man
Regards

12:04 PM  
Blogger will said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人

2:10 AM  

Post a Comment

Subscribe to Post Comments [Atom]

<< Home